Сустрэча прадстаўнікоў праваахоўных органаў і аддзела па адукацыі райвыканкама са школьнікамі была прымеркавана да пачатку новага навучальнага года і арганізавана ў рамках акцыі Дзяржаўтаінспекцыі МУС Беларусі “Увага — дзеці!”, якая праходзіць у рэспубліцы з 25 жніўня па 5 верасня.
Выступаючы перад вучнямі падчас школьнай лінейкі, інспектар дарожна-патрульнай службы аддзела ДАІ Бабрускага РАУС Яўген Пінчук засяродзіў іх увагу на тым, што з кожным годам расце колькасць ДТЗ як у гарадах, так і ў сельскай мясцовасці, і ў многіх такіх здарэннях вінаватымі аказваюцца дзеці. Ён пазнаёміў рабят з найбольш частымі небяспечнасцямі на дарогах, нагадаў асноўныя правілы дарожнага руху, папярэдзіў аб адказнасці за іх парушэнне.
Прафілактычную размову са школьнікамі наконт недапушчальнасці супрацьпраўных дзеянняў сярод падлеткаў правёў інспектар існпекцыі па справах непаўналетніх райаддзела міліцыі Алег Дзешкавец. Яркім сведчаннем таго, што, рухаючыся па праезжай частцы, трэба быць выключна пільнымі і ўважлівымі, стала дэманстрацыя дакументальнага відэафільма з кадрамі надзвычайных здарэнняў, нярэдка з сумным фіналам.
Праверыць, наколькі добра хлопчыкі і дзяўчынкі ведаюць правілы паводзін на дарогах, можна было ў час гульні з конкурсамі “Юны пешаход”, “Азбука пешахода”, “Аўтамульці” і “Зразумей мяне”, якую правяла педагог Цэнтра творчасці раёна Наталля Савасцей. Завяршыліся інтэлектуальныя баталіі ўручэннем іх удзельнікам дыпломаў, флікераў і салодкіх падарункаў.
Да сустрэчы з выхаванцамі Міхалёўскага дзіцячага прытулку, якая таксама адбылася ў гэты дзень, далучыліся старшы інспектор ДПС аддзела ДАІ Дзяніс Кавалёў, інспектар Вадзім Гулевіч і спецыяліст інспекцыі па справах непаўналетніх Крысціна Грамыка-Іваній. Госці прыбылі ва ўстанову са спартыўным інвентаром, салодкімі кавунамі і самымі добрымі пажаданнямі.
У ходзе мерапрыемства прадстаўнікі Дзяржаўтаінспекцыі звярнуліся таксама з просьбай-папярэджаннем да дарослых, вадзіцеляў, бацькоў, каб тыя асаблівую ўвагу надавалі захаванню належнай хуткасці, правілам небяспечнай перавозкі дзяцей і праезду пешаходных пераходаў. Каб яны не толькі нагадвалі пра бяспечныя паводзіны побач з праезжай часткай і на дарозе, але і паказвалі ім асабісты прыклад бездакорнага выканання правілаў дарожнага руху.
