Актывізавана ўборка цукровых буракоў. Да СВК «Калгас імя А. Неўскага» і СВК «Калгас імя Дзяржынскага», дзе дадзеным відам работ займаюцца не першы тыдзень, на гэтым — упэўнена далучылася трэцяя гаспадарка: філіял «Харчавік-Агра» ААТ «Чырвоны харчавік». З-за адсутнасці ўласнай тэхнікі, прызначанай для гэтых мэт, з уборкай буракоў у філіяле была затрымка. Але днямі на палях гаспадаркі стаў працаваць «Холмер» са Слуцкага цукровага камбіната. У цэлым па раёне з 500 га, занятых пад культуру, убрана, па апошніх дадзеных, 354 га, накапана амаль 9,5 тысяч тон клубняў пры сярэдняй ураджайнасці 267 ц/га. Між тым, калі ў СВК «Калгас імя А. Неўскага» узялі з аднаго га 452 ц, то ў філіяле «Харчавік-Агра» — 214, у СВК «Калгас імя Дзяржынскага» — 167.
Вядзецца ў раёне і ўборка кукурузы на зерне. Сёлета, у параўнанні з мінулым годам, плошчы на гэтыя мэты некалькі зменшаны. Каб задаволіць патрэбу жывёлагадоўлі ў корме, болей кукурузы, чым летась, будзе прызначана на сілас. На гэты час у цэлым па раёне ўбрана 410 га, што складае амаль трэць ад плану. Сярэднераённы паказчык ураджайнасці — 41,7 ц/га. Калі аналізаваць у разрэзе гаспадарак, то найбольшай ураджайнасці дасягнулі раслінаводы СВК «Гігант» — 82 ц/га, на другім месцы па гэтым паказчыку філіял «Варатынь» — 79,38, на трэцім — БААТ «Аграмашсервіс» — 65,87 ц/га.
Па матэрыялах грамадска-палітычнай газеты «Трыбуна працы»