— Усе хлопцы працуюць на сумленне, зацікаўлены, каб больш скасіць травастою, больш падабраць і перавезці зялёнай масы ў траншэю, якую сёння закладваем на жывёлагадоўчым комплексе, — расказвае галоўны аграном ААТ “Неўскі-Агра” і наш суправаджаты на сенажаць Аляксандр Мельнік.

Касьбы, па словах Аляксандра Іванавіча, засталося каля трохсот гектараў — на сянаж і прыкладна 500-600 га — на сена. Апошнім якраз і займаецца ў ваколіцах Мікулічаў Валерый Вавула на касілцы КМР-9.

Корманарыхтоўчымі комплексамі КВК-800 запраўляюць механізатар “Неўскі-Агра” Іван Паслядовіч і памагаты з “Аграмашсэрвіса” Аляксандр Чарніцын. На рахунку кожнага — каля 5 тысяч тон зялёнай масы. На перавозцы травы задзейнічаны механізатары і вадзіцелі Юрый Арцёменка, Аляксандр Кушавараў, Мікалай Шаўцоў, Андрэй Мяцеліца, Міхаіл Якаўлеў (ён жа працуе і на КВК-800, падабраў больш за 2 тысячы тон травы), Алег Капцілоў, Сяргей Архіпаў.

У цэлым аб’ём нарыхтаванага сенажу ў ААТ “Неўскі-Агра” складае, на раніцу сённяшняга дня, 10 700 тон пры плане 14 000 тон. З першага ўкосу, як тут кажуць, імкнуцца ўзяць па-максімуме.

Сена маецца каля 100 тон, і гэта толькі пачатак: усяго для патрэб жывёлагадоўлі патрабуецца больш за 1000 тон.

Травастоем у гаспадарцы задаволены — дажджы зрабілі сваю справу, цяпер галоўнае, каб надвор’е пасадзейнічала ўраджай убраць, нарыхтаваць якасны корм.

Адначасова з корманарыхтоўкай у “Неўскі-Агра” заняты падрыхтоўкай камбайнаў да жніва ды ўборкі рапсу.

Што да доглядных  мерапрыемстваў, то яны на пасевах і азімых, і ярыны цалкам праведзены.