Віншуючы педагогаў з надыходзячым святам, намеснік старшыні райвыканкама Святлана Носава завастрыла ўвагу на значнай ролі настаўніка ў развіцці грамадства і тым неацэнным укладзе, які сваёй штодзённай працай уносяць педагогі дзеля фарміравання ўсебакова развітай асобы, і пажадала прысутным моцнага здароўя, поспехаў у працы, зацікаўленых вучняў, шчасця ў асабістым жыцці і матэрыяльнага дастатку.
Плёну ў рабоце, аптымізму і ўдзячных вучняў пажадала педагогам начальнік аддзела ідэалагічнай работы, культуры і па справах моладзі райвыканкама Галіна Чарнова. З’яўляючыся членам прэзідыума раённай арганізацыі «Белая Русь», яна ўручыла грашовыя прэміі найбольш актыўным членам грамадскай арганізацыі.
Шмат цёплых слоў у адрас цяперашніх педагогаў і тых, хто ўжо на заслужаным адпачынку, выказала старшыня райсавета галіновай ветэранскай арганізацыі Марыя Масюковіч.
Старшыня райкама прафсаюза работнікаў адукацыі і навукі Таццяна Бокач, разам з цёплымі словамі пажаданняў, уручыла асобным кіраўнікам устаноў адукацыі граматы за развіццё і ўмацаванне сацыяльнага партнёрства, садзеянне галіноваму прафсаюзу ў рэалізацыі яго праграм.
Увагай і цёплымі словамі не былі абдзелены падчас святочнага мерапрыемства і педагогі дадатковай адукацыі: Цэнтра творчасці, дзіцяча-юнацкай спартыўнай школы, фізкультурна-спартыўнага клуба, чыя праца не меней напружаная і значная ў выхаванні гарманічнай асобы.
Сардэчныя словы, песенныя і харэаграфічныя нумары ў выкананні артыстаў раённага Цэнтра культуры і выхаванцаў Цэнтра творчасці — усё гэта адрасавалася ім: чулым і адказным, строгім і не надта, вопытным і тым, хто толькі пачынае сваю працоўную кар’еру — настаўнікам.
Мерапрыемства завяршылася на лірычнай ноце. Педагогі раёна раз’язджаліся па школах з зарадам бадзёрасці ад цудоўнага канцэрта і ўсведамлення таго, што, як бы цяжка іншым разам ні даводзілася, яны абралі патрэбную прафесію.
Па матэрыялах грамадска-палітычнай газеты «Трыбуна працы»