— Уявім сабе сяўбу. Раней падчас засейвання поля яравымі ці іншымі культурамі на пасяўной тэхніцы ўсталёўвалі спецыяльны маркер, і трактар хадзіў арыентуючыся на яго. Але гэта не заўжды ўдавалася — засушлівай парой, пры моц­ным ветры і вялікіх клубах пылу разглядзець зробленую маркерам метку было практычна немагчыма і часцяком дапускалася перакрыццё засеяных участкаў, што прыводзіла да страт пасяўнога і гаруча-змазачных матэрыялаў. Пры ўсталяваным падрульвальніку трактар аўтаматычна ідзе па зададзенай траекторыі, што выключае вышэйзгаданыя страты. Стыкавыя радкі пры гэтым атрымліваюцца дакладныя, з пагрэшнасцю ў 2-2,5 см, што зноў жа вя­дзе да эканоміі паліва, насення, мінеральных угнаенняў і сродкаў аховы. А больш якасная сяўба — расліны зна­ходзяцца на адноль­кавай адлегласці адна ад адной, раўнамерна выкарыстоўваюць спажыўныя рэчывы, не пашкоджваюцца пры руху трактара — да павелічэння ўраджайнасці культур.

Немалаважным з’яўляецца і палёгка працы механізатара — павелічэнне прыцягальнасці земляробчай справы. Пры ўсталяваным “аўтапілоце” механізатар ажыццяўляе сяўбу ці іншыя палявыя работы, не клапоцячыся аб дакладнасці руху тэхнікі нават у неспрыяльных умовах. Павялічваецца хуткасць тэхналагічных аперацый на палявых работах, што дазваляе ўкласціся ў агратэрміны.

Аснашчаць тэхніку аўтаматычнай сістэмай кіравання ў СВК “Гігант” прыступілі яшчэ ў мінулым годзе. Пад­рульвальнік тады ўсталявалі на двух трактарах. Сёлета, па словах Ігара Міхалёнка, гэтую работу працягнулі — на поле ўвесну выйдуць 5 адзінак удасканаленай тэхнікі, сярод якіх

4 энерганасычаныя трактары і “Беларус”-1221.3.  Адпаведнае абсталяванне набыта і на 5 зерневых камбайнаў.