У ААТ “Неўскі-Агра” кампанія па нарыхтоўцы травянога корму развярнулася шырокім фронтам і ў прамым, і ў пераносным сэнсах. Побач з аграгарадком Кавалі, дзе днямі падкасілі пашу, у панядзелак (дзень нашага наведвання гаспадаркі) працаваў кормаўборачны камбайн КВК-800 пад упраўленнем Аркадзя Алісеенкі. Вопытнаму хлебаробу дапамагаў, пераймаючы дэталі механізатарскай справы, дэбютант у гэтым Іван Паслядовіч. Перавозку зялёнай масы ад камбайна ажыццяўлялі Мікалай Крусір на МАЗе і Аляксандр Кушавараў на трактары МТЗ-3022 з прычэпам. Таксама на гэтай рабоце былі задзейнічаны Міхаіл Міхалёнак і Міхаіл Якаўлеў.

Непасрэдна касьбой займаліся Леанід Шкра­дзюк — непадалёк ад в. Постраш, і Валерый Вавула — у ваколіцах Сімгаравічаў. У першым выпадку травастой прызначаўся для здрабнення на зялёную масу, сянаж, у другім — на сена. Прыемна было назіраць, як, імкліва рухаючыся па сенажаці, высокавытворчы агрэгат Валерыя Васільевіча — трактар МТЗ-3522 з касілкай КМР-9 (ім механізатар запраўляе чацвёрты сезон) — упэўнена пакідаў пасля сябе шырокія палосы пакосаў.

— Нам бы тэхнікі паболей, а трава сёлета нарасла, што трэба, — падзяліўся клопатамі летняга дня галоўны аграном гаспадаркі Аляксандр Мельнік. І заўважыў, што вельмі любіць такую пару: спраў шмат, людзі задзейнічаны, усюды кіпіць работа і бачны яе вынік.

План на сёлетнюю корманарыхтоўку ў ААТ “Неўскі-Агра”, як заўжды, унушальны — 15 000 тон сенажу, звыш 1250 тон сена і 20 000 тон сіласу. З іх нарыхтавана пакуль небагата (па дадзеных на раніцу ўчарашняга дня мелася 1490 тон сенажу, спрэсавана 160 тон сена), але ж і работы ў гэтым накірунку наперадзе шмат.

— Працуем. Крыху замінка выйшла ў сувязі з дажджамі, але ж і гэта імкнемся прадугледзець — стараемся падбудавацца пад надвор’е. Разумеем — работу гэтую трэба рабіць, корм нарыхтоўваць у любой сітуацыі. І пакуль, здаецца, атрымоўваецца, — адзначыў дырэктар ААТ “Неўскі-Агра” Міхаіл Стрыжэўскі, якога таксама засталі на сенажаці.
Зрэшты, травянога корму ў гаспадарцы засталося яшчэ і леташняга — 5 траншэй сіласу і дзве — сенажу, яго статку і прапаноўваюць.

Адначасова з корманарыхтоўкай у гаспадарцы займаюцца хімпраполкай кукурузы (пасевы радуюць вока раўнюткімі радамі), а хутка возьмуцца за яе падкормку. Праводзяць высейванне адналетнікаў — на гэтай рабоце заняты Юрый Канаплёў, падвозку насення на поле ажыццяўляе Анатоль Пялешка.

Мікалай Крусір

Аляксандр Кушавараў

Іван Паслядовіч з Аркадзем Алісеенкам

Аляксандр Мельнік і Валерый Вавула

Леанід Шкрадзюк

Корманарыхтоўка — асноўны клопат хлебаробаў на гэтую пару, заняты ў кампаніі ўсе без выключэння сельгасарганізацыі.

У цэлым па раёне, па дадзеных Бабруйскага райсельгасхарчу на 4 чэрвеня, сенажу нарыхтавана 22 657 тон або 24% ад плану, сена — 422 тоны ці 5% ад патрэбы. Найбольш актыўнымі тэмпамі вя­дзецца корманарыхтоўка ў СВК “Гігант”, дзе сенажу ўжо маецца 63% (9650 тон) ад неабходнага аб’ёму, сена — 12% або 160 тон. Нядрэнныя тэмпы сяўбы таксама ў філіяле “Харчавік-Агра” ААТ “Чырвоны харчавік” — сенажу ў гаспадарцы нарыхтавана больш за чвэрць ад неабходнага. У ліку іншых работ на гэтую пару — хімпраполкі кукурузы, грэчкі, бульбы, падкормка кукурузы, сяўба адналетняй травы і мнагалетнікаў.