Засяродзіўшы ўвагу на значнасці пытання, начальнік райельгасхарчу нацэліў членаў пасяджэння працягваць трымаць яго на пастаянным кантролі. У тым ліку сістэматычна даносіць інфармацыю па папярэджанні афрыканскай чумы свіней і курынага грыпу да насельніцтва як пасродкам сходаў вяскоўцаў, так і праз раённыя СМІ, а таксама падваровы абыход домаўладанняў і тлумачальныя размовы з жыхарамі так званай буфернай зоны. “Гаспадары домаўладанняў, дзе вырошчваюць свіней, павінны быць азнаёмлены не толькі з мерамі прафілактыкі хваробы, але і з алгарытмам дзеянняў у выпадку любога падзяжу жывёлы”, — адзначыў Аляксей Жураўлёў.
Члены штаба заслухалі і ў дэталях абмеркавалі справаздачы кіраўнікоў і галоўных ветурачоў сельгаспрадпрыемстваў па выкананні прадпісанняў пратакола мінулага пасяджэння. Асаблівая ўвага была нададзена правядзенню работы па забеспячэнні мер бяспекі ў ААТ “Агракамбінат Бабруйскі”, СВК “Гігант”, ЗАТ “Птушкафабрыка “Вішнёўка”— гаспадарках, дзе займаюцца развядзеннем свіней і птушкі.
У цэлым, як было адзначана, эпідсітуацыя ў раёне не выклікае занепакоенасці. Аднак гэта не дае падставы зацікаўленым службам і ўсім, хто звязаны з жывёлагадоўляй адпаведных напрамкаў, заспакойвацца. Работу па недапушчэнні заносу на тэрыторыю раёна небяспечных для эканомікі хвароб неабходна працягваць, жыхароў варта і далей знаёміць з прафілактычнымі мерамі, бо папярэджаны — значыць, абаронены.
