— Кукурузы сеялі 500 гектараў на зялёны корм і 100 га — на зерне. Аднак з-за поўнага выспявання расліны 50 гектараў, што планавалі пад закладку на сілас, вырашылі таксама ўбраць на зерне. Ураджай сёлета атрымалі выдатны. Дзякуючы гэтаму корму ўжо маем звыш 50 ц к. адз. на ўмоўную галаву жывёлы. Гэта дае нам упэўненасць у заўтрашнім дні, надзейным функцыянаванні нашай жывёлагадоўлі, — кажа дырэктар Валерый Сяргейчык.
І хоць прычынай высокай ура­джайнасці кукурузы Валерый Аляксандравіч называе садзеянне надвор’я — маўляў, прырода ўраўнаважыла недабор зерня збажыны — кожны, хто знаёмы з сельскай гаспадаркай, разумее, што станоўчы вынік — гэта яшчэ і добрая арганізацыя работ, і тэхналагічнасць вырошчвання культур.

— На зерне сеялі кукурузу расійскага гатунку. Расліну атрымалі прыгожую, пад 4 метры ў вышыню. Дала нам два пачаткі, і ўраджай­насць — проста супер! І беларускі гатунак “Палескі” таксама не падвёў. 50 гектараў, што перавялі ў зерневую групу і заканчваем убіраць, таксама высокаўраджайныя, — дзеліцца кіраўнік.

Сабранае зерне гаспадарка адразу ж, у сырым выглядзе, адгружае на БНБК. Пры гэтым 300-350 т збіраюцца пакінуць сабе ў карыстанне: сплюшчыць і зімой разнастаіць рацыёны жывёлы.

Клопат пра жывёлагадоўлю ў акцыянерным таварыстве зразумелы: з выручанага за прадукцыю гаспадарка (уваходзіць у склад “БНБК-
АГРА Бабруйск”) жыве і спрабуе развівацца. Тэмп росту вытворчасці малака за кастрычнік (у параўнанні да папярдняга года) склаў 123%, рэалізацыі — 130% пры таварнасці малака 90%. Сярэднесутачныя прывагі ў вазе маладняку буйной рагатай жывёлы — тэхналагічныя (770 г) і найвышэйшыя ў раёне.
Каб быць з зернем і сакавітым кормам у наступным годзе, у саўгасе пасеялі больш за 800 га азімых, у тым ліку 750 га — на зерне. Пасля заканчэння сяўбы ўзяліся за падняцце зябліва. На дзень нашага наведвання восеньскім ворывам было ахоплена 80 га ці 10% ад патрэбы.
— Пасля поўнага завяршэння ўборкі кукурузы і звозкі з палёў спрэсаванага сена, што плануем ажыцця­віць да пачатку лістапада, падняцце зябліва актывізуем, задзейнічаем на гэта ўсе тэхнічныя і людскія рэсурсы, — удакладняе галоўны аграном ААТ Марына Капорына.
Хоць цякучка кадраў у ААТ ёсць, але маецца і трывалы касцяк: ва­дзіцеляў, механізатараў, работнікаў жывёлагадоўлі, спецыялістаў — лю­дзей, якія бездакорна служаць галіне не адзін год.
У прыклад кіраўнік прывёў працаўнікоў, якія ў той дзень рупіліся на кукурузным полі. За штурваламі кормаўборачнай тэхнікі былі Аляксандр Рагалевіч (з улікам кукурузы намалаціў на камбайн каля 1800 т зерня) і Аліхан Кантаеў (за добрасумленную працу ўзнагароджаны юбілейным медалём на абласных “Дажынках-2023”). На адвозцы зерня — Алег Дзікі (разам з кукурузай перавёз звыш 2000 т зерня).
“У нашым невялікім калектыве ёсць свае перадавікі, і мы імі ганарымся. А ўвогуле ў сельскай гаспадарцы, каб мець станоўчы вынік, трэба проста працаваць: на палях, на фермах, і любіць справу, якой зай­маешся”, — падвёў рысу дырэктар.

Трыбуна працы