Вяскоўцаў на камісію прыйшло няшмат, але адчувалася, што людзі сапраўды зацікаўлены ў працаўладкаванні і, як ахарактарызавала старшыня сельвыканкама Таццяна Будзько, не злоўжывальнікі спіртнымі напоямі.
Да прыкладу, грамадзянін 1988 года нараджэння па спецыяльнасці слесар-рамонтнік. Выказаў гатоўнасць на работу не толькі ў сельскай мясцовасці, але і Бабруйску. Вакансіі для яго ў камісіі знайшліся, у тым ліку — у зверагаспадарцы. Задаўшы маладому чалавеку некалькі пытанняў, кіраўнік арганізацыі прапанаваў яму прымяніць свае веды і навыкі на прадпрыемстве. Для гэтага маладому чалавеку парэкамендавана наведацца ва ўпраўленне па працы, занятасці і сацабароне райвыканкама за накірункам на работу і дэталёвымі тлумачэннямі наконт далейшых дзеянняў.
Без стабільнага заробку застаўся і жыхар Старой Шараеўшчыны 1974 года нараджэння, у нядаўнім — жывёлавод. Жыццёвая дарога грамадзяніна не без хібаў — некалькі разоў адбываў пакаранне за супрацьпраўныя ўчынкі, і гэта, як лічыць, перашкаджае яму працаўладкавацца. Члены камісіі з такім меркаванннем не пагадзіліся, назваўшы галоўнай умовай для атрымання вакантнага месца — добрасумленныя адносіны да абавязкаў, выкананне працоўнай дысцыпліны. Калі для шукальніка работы такое прымальна, то і яго ў бліжэйшы час камісія паабяцала працаўладкаваць.
— Сёння на пасяджэнне прыйшлі людзі, якія сапраўды хочуць працаваць — страцілі гэтую магчымасць у сувязі з нейкімі жыццёвымі сітуацыямі. Мы паспрабавалі ім дапамагчы. Спадзяюся, што гэта будзе мець станоўчыя вынікі — людзі заступяць на працоўныя месцы і будуць прыносіць карысць як сабе, так і ўсяму грамадству, — адзначыў Геворг Мелканян.
Сярод жыхароў Хімоўскага сельсавета, якія значацца ў спісе беспрацоўных, нямала тых, хто знайшоў сабе прымяненне ў Расійскай Федэрацыі. Кожны такі выпадак — гэтая задача пастаўлена перад старшынёй сельсавета і сакратаром камісіі — павінен быць пацверджаны дакументальна (даведкай ад наймальніка), што дазволіць камісіі выключыць грамадзян са спісу беспрацоўных.