Якія складаючыя здароўя падлетка? Чаму быць здаровым фізічна — не азначае быць здаровым у прынцыпе? Чаму нельга заставацца сам на сам з праблемай? Якім бывае насілле? Да якіх хвароб прыводзіць курэнне ў дзіцячым и падлеткавым узросце? Чаму электронная цыгарэта не меней шкодная за звычайную? Гэтыя і іншыя пытанні абмеркавалі ўчора падчас міжведамаснага мерапрыемства “Асноўныя складаючыя здароўя падлетка” са старшакласнікамі Цялушскай сярэдняй школы ўрач падрастковага кабінета БГП №2 Валянціна Фёдарава, інсруктар-валеолаг Ларыса Колесава, псіхолаг установы Алена Ганчарова. Апошняя, у прыватнасці, адзначыла, што сярод відаў насілля, якое пагражае непаўналетняму і выпадкі якога, як паказвае практыка, маюць месца і ў нашым грамадстве, — сексуальнае. І вельмі важна падлетку, у дачыненні якога ўчынена такое насілле, не замкнуцца, не застацца сам на сам з болем, псіхалагічнай траўмай. Варта абавязкова паведаміць аб праблеме дарослым, якім давяраеш: бацькам, родзічам, настаўнікам, у іншых выпадках — псіхолагу, у тым ліку паліклінікі №2. Прычым, можна як прыйсці на прыём, так і патэлефанаваць на “гарачую лінію”, якая праводзіцца спецыялістамі.
Спецыяліст Інспекцыі па справах непаўналетніх Бабруйскага РАУС Наталля Шункевіч, якая таксама прыняла ўдзел у мерапрыемстве, заакцэнтавала ўвагу аўдыторыі на правапарушэннях, якія ўчыняюць падлеткі. Нагадала, што “мець адносіны” з наркатычнымі сродкамі, адважвацца на любыя іншыя супрацьпраўныя ўчынкі не толькі пагрозліва для здароўя і жыцця, але і стратна для сямейнага бюджэта.
— Задача, якую мы ставім, сустракаючыся з падлеткавай аўдыторыяй, — не запалохаць: гэта не дае станоўчага выніку. А данесці да свядомасці кожнага неабходнасць захоўваць фізічнае і псіхічнае здароўе з маленства. Не паддавацца спакусам “сяброў” паспрабаваць тую ж цыгарэту ці наркотык за кампанію, дзеля цікавасці, а быць гаспадаром сваіх учынкаў. Ведаць і памятаць, што жыццё разнастайнае і надзвычай цікавае, а тое, ці змогуць паспытаць яго паўнату і шматграннасць, залежыць найперш ад іх жа, — адзначыла Ларыса Колесава.
