Учора Палац прыняў лепшых аграрыяў Магілёўшчыны, якія прыехалі ў сталіцу разам з сем’ямі. Ад Бабруйскага раёна там пабываў механізатар СВК “Гігант” Алег Вяроўкін (пераможца раённага сельскагаспадарчага спаборніцтва на ўборцы збожжавых і зернебабовых раслін) з жонкай Кацярынай Віктараўнай, кладаўшчыком гаспадаркі, і дачкой Юліяй. Дэлегацыю нашага раёна узначаліла старшыня Бабруйскага райкама прафсаюза работнікаў аграпрамысловага комплексу Надзея Дудаль.
Хлебаробы з цікавасцю пазнаёміліся з выставачнай часткай праекту “Да Беларусі — з любоўю і пяшчотай”, пабывалі ў больш за 10-ці залаў, сфатаграфаваліся на памяць у пакоях, якія раней бачылі толькі з экранаў тэлевізараў. І падзяліліся ўражаннямі ад пабачанага і паездкі:
“Спадабалася выключна ўсё. Сам Палац уразіў сваёй веліччу і хараством. Сцены, інтэр’ер, мэбля — усё зроблена і падабрана з густам. Шмат пабачылі і пачулі цікавага. Пабывалі ў залах, дзе праходзяць асабліва значныя падзеі. Да прыкладу, прыём ганаровых гасцей, цырымоніі ўзнагароджання грамадзян, якія заслужылі гонару быць адзначанымі Прэзідэнтам. Пабывалі ў прыёмнай Аляксандра Лукашэнкі, у музеі падарункаў кіраўніка дзяржавы і шмат дзе яшчэ. Уражанні засталіся вельмі яскравыя, і я з задавальненнем пабываў бы там яшчэ”, — адзначыў Алег Уладзіміравіч.