Свята тым болей значнае для нашага раёна, дзе аснову эканомікі складаюць арганізацыі менавіта сельскагаспадарчага накірунку. З якімі вынікамі ў раслінаводстве і жывёлагадоўлі падыйшла Бабруйшчына да гэтай даты і якія задачы стаяць перад аграрыямі на год наступны, — пра гэта і іншае ў нашым інтэрв’ю з першым намеснікам старшыні Бабруйскага райвыканкама, начальнікам упраўлення па сельскай гаспадарцы і харчаванні Аляксеем Жураўлёвым.

— Аляксей Анатольевіч, ці парадаваў сёлета ўра­джай і як ацэньваеце вагу непасрэдна хлебнага караваю?
— Хлебным караваем якраз-такі і не надта задаволены: ураджайнасць збожжавых і зернебабовых раслін атрымалі ніжэйшую, чым у папярэднім годзе, а зна­чыць, меншы атрымаўся і намалот зерня. Паўплывала анамальна засушлівае надвор’е, якое выпала якраз на перыяд, калі зерне збажыны налівалася, і раслінам асабліва патрабавалася вільгаць. Калі гаварыць пра кукурузу, аб’ёмы якой у раёне ў апошнія гады значна павялічылі, то для яе год склаўся проста цудоўна, ураджайнасць і зялёнай масы (290 ц/га), і зерня (85 ц/га) атрымалі выдатную. Да спрыяльнага для кукурузы надвор’я дадалося і тое, што пасеялі культуру ў агратэхнічныя тэрміны, у час выканалі тэхналагічныя патрабаванні да догляду пасеваў: падкормку, апрацоўку ад шкоднікаў і хвароб. Калі аналізаваць у разрэзе гаспадарак, то найбольш высокія ўраджаі зялёнай масы, зерня атрымалі ў СВК “Гігант”, “ААТ “Саўгас Кісялевічы”, ААТ “Міхалёўская Ніва”, ААТ “Неўскі-Агра”. Парадавала бульба — у сярэднім з гектара ўзялі па 389 цэнтнераў. Валавы збор толькі ў “Гіганце”, у параўнанні да 2022 года, павялічылі на 3000 тон. З ростам па вале клубняў спрацавалі і іншыя, у тым ліку сялянска-фермерскія гаспадаркі.

— Ці значыць гэта, што грамадская жывёлагадоўля да новага ўра­джаю будзе забяспечана травяным кормам?
— Травянога корму ў раёне нарыхтавана дастаткова — 34 цэнтнеры кармавых адзінак на ўмоўную галаву жывёлы, што на 3 ц к.адз. болей, чым у мінулым годзе. З-за засухі некалькі меней, чым у папярэднім годзе, назапасілі сена і сенажу, затое болей чым калі заклалі кукурузнага сіласу. У цэлым, калі гаварыць пра нарыхтаваны травяны корм, то на сёння даведзенае вобласцю заданне па яго аб’ёмах раёнам выканана на 118,8%. У лідарах па аб’ёмах нарыхтаванага на ўмоўную галаву — ААТ “Саўгас Кісялевічы” (48 ц к. адз.), СВК “Гігант” (43 ц к. адз.). У “Гіганце” таксама і вялікія патрабаванні да якасці корму.

— Як спрацавала жывёлагадоўля?
— Паказчыкі ў жывёлагадоўлі па выніках 10 месяцаў “плюсуюць” у параўнанні да адпаведнага перыяду мінулага года, і гэта радуе. Тэмп росту валавой вытворчасці малака за студзень-кастрычнік склаў 104,7%, рэалізацыі — 105,8%. Удой малака на адну карову ў сярэднім па раёне — 4086 кг, што на 233 кг болей, чым за адпаведны перыяд 2022 года. А ў тым жа філіяле “Варатынь” ААТ “БЗТДіА” — гаспадарцы-лідары па надоях, за 10 месяцаў на рагулю надоена 6426 кг малака, у СВК “Гігант” і філіяле “Харчавік-Агра” ААТ “Чырвоны харчавік” — па 5500 кг. Найбольшага росту вытворчасці, у параўнанні да мінулага года, дасягнулі калектывы ААТ “Міхалёўская Ніва”, ААТ “Саўгас Кісялевічы”, СВК “Гігант”. Дасягнуты рост таксама і ў вырошчванні жывёлы. Тэмп росту вытворчасці мяса за 10 месяцаў склаў 113,5%, у тым ліку буйной рагатай жывёлы — 116,8%, свіней — 156,9%.

— У чым бачыце патэнцыял для нарошчвання аб’ёмаў вытворчасці зерня, малака, мяса? А значыць, паляпшэння фінансавага стану, прыбытковасці сельгасарганізацый?
— І ў раслінаводстве, і ў жывёлагадоўлі гэта — тэхналагічнасць працэсаў. Там, дзе тэхналогіі прымяняюцца, і вынікі адпаведныя. У малочнай галіне відавочны прыклад — філіял “Варатынь”. У калектыве строга падыходзяць да выканання тэхналагічных патрабаванняў даення, таму і на карову за 10 месяцаў атрымана не 4086 кілаграмаў, як у сярэднім па раёне, а без малога 6 з паловай тысяч. Вялікія патрабаванні да навуковага падыходу ў вытворчасці малака і мяса, а значыць — і адпаведныя вынікі, у “Гіганце”, філіяле “Харчавік-Агра”. Наш патэнцыял таксама — у развіцці. З пачатку года пагалоўе буйной рагатай жывёлы павялічылі на 1219 галоў, у тым ліку на 70 галоў — дойны статак. Значна прыраслі (+3456) па пагалоўі свіней. Дзеля стварэння ўмоў для далейшага наро­шчвання вытворчасці малака і мяса пачалі ўзвядзенне двух малочна-таварных комплексаў: у філіяле “Харчавік-Агра” і ААТ “Міхалёўская Ніва”. Яшчэ адна складаючая, якая здольна станоўча паўплываць на развіццё сельгасвытворчасці — зацікаўленыя кадры, моладзь. З гэтым, трэба прызнацца, не ўсё так добра, як хацелася б, але і ў дадзеным накірунку працуем. Маладых людзей, якія прыходзяць у сельгас­арганізацыі, матывуюць высокім заробкам, добрымі ўмовамі працы. Трэба разумець, што механізатар сёння і дзясятак год таму — дзве вялікія розніцы: сучасная тэхніка высокавытворчая, аўтаматызаваная, зручная ў выкарыстанні. Сур’ёзна падыходзім да арганізацыі вольнага часу моладзі — сумесна з прафсаюзам АПК наладжваем экскурсіі не толькі па раёне, але і па рэс­публіцы, за кошт прафсаюза арганізавалі для маладых спецыялістаў паездку ў Расійскую Федэрацыю. Прыцягваем юнакоў і дзяўчат да ўдзелу ва ўсемагчымых конкурсах, спаборніцтвах, турзлётах, грамадскім жыцці раёна. Створаны магчымасці для кар’ернага росту моладзі. З мэтай прыцягнення ў галіну мясцовых маладых людзей, якія з большай верагоднасцю замацуюцца на малой радзіме, ва ўстановах адукацыі створаны аграрныя класы, якія да­юць перавагу абітурыентам пры паступленні ў профільныя навучальныя ўстановы. Таксама прапаноўваем юнакам і дзяўчатам заключыць дагаворы на мэтавае навучанне па дэфіцытных у раёне спецыяльнасцях сельскагаспадарчага накірунку, што выгадна як для іх саміх, так і наймальнікаў. Словам, прадпрымаем усемагчымыя захады па мінімізацыі дэфіцыту кадраў у галіне. І, вядома ж, патэнцыял — у паляпшэнні выканальніцкай і працоўнай дысцыпліны людзей, якія ўсклалі на сябе абавязак забяспечваць краіну сельгаспрадукцыяй. У цэлым жа хачу адзна­чыць, што сельскай гаспадаркай раёна прадпрымаецца ўсё для таго, каб харчовая бяс­пека краіны была забяспечана. І кожны, хто працуе ў галіне: вырошчвае хлябы, атрымлівае малако, даг­лядае жывёлу, арганізуе і накіроўвае працу калектываў — мае прамое да гэтага дачыненне.

— Дзякуй, Аляксей Анатольевіч, за размову. Засталося толькі традыцыйнае пытанне — што б хацелі пажадаць з нагоды прафесійнага свята работнікам галіны, якую курыруеце?
— Жадаю работнікам сельскай гаспадаркі і перапрацоўчай галіны здароўя, дабрабыту, цёплых узаемаадносін у сем’ях, працоўных поспехаў на карысць раёна і краіны і абавязкова мірнага неба над галавой.