Пасяўная кампанія стартавала на Бабруйшчыне ў мінулыя выхадныя. У адкрытых акцыянерных таварыствах «Неўскі-Агра», «Міхалёўская Ніва», «Агракамбінат Бабруйскі» і філіяле «Харчавік-Агра» ААТ «Чырвоны харчавік-АграСэрвіс» сяўбу ранняй ярыны пачалі традыцыйна з аўсу — у народзе кажуць «сей авёс у гразь, будзеш князь». У «Харчавіку-Агра» ўносяць у глебу таксама і насенне аўсу. Філіял «Варатынь» распачаў пасяўную кампанію зернебабовымі.
Усяго ў гэтую весну, як паведаміў начальнік вытворчага аддзела райсельгасхарчу Віктар Садоўскі, пад раннюю ярыну — збожжавыя і зернебабовыя расліны, у раёне плануецца заняць 4 438 гектараў, у тым ліку 650 га — пад авёс, 2 898 га — пад ячмень, 890 га адведзена пад зернебабовы клінок.