Работы на адзічаўшых, раней меліяраваных землях непадалёк ад вёсак Грабава і Каменка Слабадкоўскага сельсавета меліяратары ААТ «ПМК-84 «Водбуд» пачалі яшчэ ўвосень.
— Найперш выкарчавалі непатрэбную расліннасць. Затым узяліся за ачыстку каналаў меліярацыйнай сістэмы, прамыўку дрэнажных сістэм, што меліся. Уласнымі намаганнямі, трактарамі МТЗ 1221 і 3022, правялі ворыўныя работы. Далей было вырашана дадаткова пракласці новыя дрэнажныя сістэмы, чым на гэтую пару актыўна займаемся, — расказвае начальнік участка Аляксандр Васільевіч Кісялёў.
Частка брыгады, сярод якіх і сам Аляксандр Кісялёў, у панядзелак была занята на ўстаноўцы калодзежа, прызначэнне якога — паглынаць ваду, перанакіроўваць лішкі вільгаці, якія могуць здарацца вясной, у сажалку. Далей вада (з дапамогай калектара) будзе адводзіцца ў канаву.
Аляксандр Гусеў
Сцяпан Казакоў (злева) і Анатоль Кандраценка
Уладзімір Іванавіч Сігаеў
Аляксандр Васільевіч Кісялёў
Сяргей Іванавіч Бобрыкаў
Фронт работ на ўчастку па рэканструкцыі меліярацыйнай сістэмы быў вызначаны вялікі. Каб усё ахапіць, хутчэй здаць аб’ект, меліяратары працуюць з поўнай выкладкай, як кажуць, і па суботах.
— Стараемся, каб у аграрнікаў была магчымасць засеяць палі і атрымаць з іх ураджай яшчэ ў гэтым годзе, — кажа начальнік участка.
Дарэчы, і ў «Агракамбінаце Бабруйскі», і ў «Саўгасе Кісялевічы» нанова меліяраваныя землі засеюць мнагалетняй травой, якая, з вялікай верагоднасцю, тут павінна быць ураджайнай.
