— Сёлета ўсе культуры сеем прыкладна на тыдзень-паўтара раней звычайнага, — адзна­чыў галоўны аграном гаспадаркі Уладзімір Залужны. — Кукурузу сталі сеяць у аптымальныя агратэхнічныя тэрміны, калі глеба прагрэлася да тэмпературы 10-15 градусаў. Палі падрыхтавалі ў адпаведнасці з тэхналагічнымі патрабаваннямі. Сяўбу вядзем з улікам рэкамендуемых правілаў і нормаў. А ўжо як нябесная канцылярыя распарадзіцца вільгаццю і якім увогуле будзе надвор’е (на дзень нашага наведвання дажджоў не было), толькі там і ведаюць. Нам жа застаецца спадзявацца на лепшае, зроблена для гэтага ўсё неабходнае, — дадаў ён.

З 1050 гектарамі кукурузы — клінок на зерне ў параўнанні з леташнім годам у гаспадарцы некалькі павялічылі — да 9 мая разлічваюць справіцца. З іх па стану на ўчарашнюю раніцу было пасеяна 600 гектараў. Насенне выкарыстоўваюць якаснае, замежнай (для кукурузы на зерне) і айчыннай селекцый.

Што да бульбы, то план яе пасадкі ў СВК “Гігант”, як і штогод, унушальны — 400 гектараў. З іх на ўчора было пасаджана 350 га. Задзейнічаны на гэтай рабоце 4 бульбасаджалкі Grimme пад кіраўніцтвам земляробаў са стажам і маладых — Валянціна Тарасевіча, Аляксандра Шумскага, Васіля Шабана, Дзяніса Ціханава.

Аляксандр Шумскі

Васіль Шабан

Андрэй Лысенка

Структуру пасадачнага матэрыялу, па словах галоўнага агранома, дыктуе рынак. Сёлета гэта “прыкладна 50 на 50” — замежны гатунак “Рэд Скарлет” і запатрабаваныя на ўнутраным рынку беларускія “Брыз”, “Маніфест”.

Сяўбой кукурузы заняты і ў іншых сельгасарганізацыях. У цэлым па раёне, па апошніх дадзеных, пасеяна звыш 5000 гектараў з запланаваных 8600. Бульба ў раёне пасаджана на плошчы 390 гектараў з плану ў 550 га.