— Убіраем апошняе поле, — заўважае Валерый Васільевіч Вавула, на хвілінку пакідаючы штурвал камбайна па ўборцы буракоў «Холмер» (у гаспадарцы мы пабывалі ў чацвер). На запытанне, як ацэньваюць механізатары сёлетні ўраджай, і ён, і памочнік камбайнера Леанід Пятровіч Шкрадзюк у адзін голас адказалі: «Выдатны!».
Апошняе пацвярджаюць і ў канторы. Пры гэтым дадаюць — клубні мала таго што буйныя, дык і чыстыя, перапрацоўшчыкі Слуцкага цукроварафінаднага камбіната бяруць іх з вялікай ахвотай.
Па словах галоўнага агранома Аляксандра Іванавіча Мельніка, сёлетні год для культуры спрыяльны. Але ў адзін шэраг да надвор’я варта паставіць і адпаведны догляд — уздабленне глебы дастатковай колькасцю арганікі, своечасовую праполку.
Ужо колькі год як у гаспадарцы не адвозяць выкапаныя караняплоды ў бульбасховішча, а складзіруюць там жа на полі да часу продажу. Па-першае, эканомяцца сродкі на іх перавозку, па-другое, гародніна не падвяргаецца дадатковым пашкоджанням.
Зрэшты, камбайн па ўборцы буракоў у гаспадарцы не прастойвае. Пасля таго як выкапае ўласныя салодкія караняплоды, дапамагае ў гэтым іншым сельгасарганізацыям, у тым ліку па-за межамі раёна — прыносіць дадатковы прыбытак.
Завяршаюць у ААТ «Неўскі-Агра» і капанне бульбы. З плану ў 120 гектараў убрана 110 га, накапана каля 2 тысяч тон клубняў.
У гэтай рабоце задзейнічана тры бульбаўборачныя камбайны. У складзе механізатарскіх экіпажаў — Аляксандр Лявонцьевіч Максімаў з памочнікам Міхаілам Сцяпанавічам Сулімам, Аляксандр Уладзіміравіч Алісеенка з Андрэем Іванавічам Грынем і Сяргей Рыгоравіч Стэльмак.
Сабраныя клубні праходзяць праз сартаванне. Харчовая бульба затарваецца ў сеткі для рэалізацыі.
Па матэрыялах грамадска-палітычнай газеты «Трыбуна працы»