З гэтай нагоды ў госці да суседзяў завітала вакальная група “Шчодрыца” Рэдкарожскага сельскага ДК і добравядомы мясцовым жыхарам Андрэй Лобан з гармонікам. Разам з загадчыцай бібліятэкі-клуба Кацярынай Вавілавай і ахвочымі да песні вішнёўцамі яны зрабілі канцэртную праграму Дня вёскі цікавай і насычанай.
Цёплай атмасферы ўрачыстасці пасадзейнічаў выступ старшыні мясцовага сельвыканкама Аляксандра Башана, які павіншаваў сяльчан са святам, пажадаў ім здароўя і дабрабыту, а населенаму пункту — даўгалецця і росквіту. Ён жа выказаў цёплыя словы падзякі ў адрас дэпутата мясцовага Савета дэпутатаў Дзяніса Прышчэпы за спонсарскую падтрымку, дзякуючы якой многія жыхары Вішнёўкі атрымалі падарункі. Апошніх удастоіліся доўгажыхарка (96 год) Любоў Токарава, самая маладая шматдзетная сям’я Вадзіма і Юліі Усавых, шматдзетная сям’я з найбольш працяглым (болей за 60 год) шчаслівым шлюбам Генадзя і Валянціны Башан, а таксама прадстаўнікі арганізацый сацыяльнай сферы Вішнёўкі, чый працоўны стаж вызначаецца не адным дзясяткам год.
Усе, хто наведаў у гэты дзень бібліятэку-клуб, не засталіся абыякавымі да выставы работ дэкаратыўна-прыкладной творчасці, створаных вішнёўскімі майстрыхамі.
Па матэрыялах грамадска-палітычнай газеты “Трыбуна працы”