На сустрэчу з вучнямі 7-11-х класаў прыехалі медыкі Бабруйскай гарадской паліклінікі № 2: псіхолаг Алена Ганчарова, урач падлеткавага кабінета Валянціна Фёдарава, інстуктар-валеолаг Ларыса Колесава і пратаіерэй Іаан Каляда, кіраўнік аддзела па ўзаемадзеянні з установамі аховы здароўя Бабруйскай епархіі. Спікеры, кожны са свайго боку, давялі школьнікам, наколькі важна з дзяцінства захоўваць духоўнае і фізічнае здароўе.
У прыватнасці, Іаан Каляда засяродзіў увагу на поглядзе праваслаўнай царквы на праблему брыдкаслоўя ў грамадстве (у гэтыя дні БПЦ праводзіць асветніцкую акцыю «Я і мая сям’я — без брыдкаслоўя»). Спыніўся на шкодзе ад выкарыстання мацернай лексікі, што апошнім часам назіраецца ў асяродку моладзі. Брыдкаслоўе назваў не толькі вялікім грахом перад богам, але і пагрозай духоўнаму і фізічнаму здароўю чалавека, заклікаў да духоўнай і цялеснай чысціні не толькі саміх школьнікаў, але праз іх — бацькоў, у чыіх сем’ях падобнае дазваляюць.
Цікава і захапляльна, з выкарыстаннем інтэрактыву распавяла пра спосабы захавання сямейных каштоўнасцяў Алена Ганчарова. Школьнікі наперабой удзельнічалі ў гульнях — вызначалі найбольшыя для сябе каштоўнасці і прапаноўвалі магчымыя спосабы ўкаранення апошніх у сям’і.
Валянціна Фёдарава давяла вучням пра алкагалізм — наймацнейшы разбуральнік сямейных каштоўнасцяў у грамадстве. Падрабязна спынілася на негатыўным уздзеянні алкаголю на дзіцячы і падлеткавы арганізм.
У падагульненне размовы Ларыса Колесава яшчэ раз нагадала школьнікам, як важна быць здаровым, распавяла пра спосабы абароны сям’і ад грыпу і вострых рэспіраторных вірусных захворванняў, назваўшы прышчэпку найбольш дзейсным з іх.
