З улікам таго, што тэма актуальная і для нашага раёна, супрацоўнікі ДАІ Бабруйскага РАУС праводзяць у гэтым накірунку немалую прафілактычную работу. У рамках рэспубліканскай акцыі сумесна з з кіраўніцтвам СВК «Гігант» (пры непасрэднай ініцыятыве кіраўніка сельгаспрадпрыемства Міхаіла Левакова) 21 лютага сустрэліся з работнікамі гаспадаркі, распавялі ім аб важнасці выкарыстання святловяртаючых элементаў, прывялі прыклады таго, як, пагарджаючы апошнім, людзі страчваюць здароўе і жыццё.
СВК «Гігант», са свайго боку, набыў для ўсіх работнікаў святловяртаючыя жылеты і павязкі — усяго болей за сто. Іх аператарам машыннага даення, механізатарам і вадзіцелям уручыў галоўны інжынер гаспадаркі Ігар Міхалёнак. Ён жа адзначыў, што, у мэтах забеспячэння бяспекі работнікаў, штогод набываецца спецадзенне са святловяртаючымі элементамі.
«Хочацца, каб вяскоўцы нарэшце ўсвядомілі значнасць выкарыстання флікераў як для іх саміх, так і для іншых удзельнікаў дарожнага руху, — адзначыў начальнік аддзела ДАІ Бабруйскага РАУС Віктар Харлап. — З улікам таго, што многія з іх — работнікі сельгаспрадпрыемстваў (за мінулы год адміністрацыйную адказнасць панеслі 54 работнікі СВК), то клапаціцца пра гэта, лічу, неабходна сумеснымі намаганнямі. Прыемна, што ў «Гіганце» гэта разумеюць (аналагічнае мерапрыемства прайшло ў ААТ «Неўскі-Агра»). Спадзяемся, што да акцыі ДАІ падключацца і астатнія раённыя сельгаспрадпрыемствы».
Таксама падчас мерапрыемства начальнік аддзела ДАІ завастрыў увагу інжынернай службы і механізатараў на наяўнасці і спраўнасці прыбораў асвятлення на сельгастэхніцы — адной з умоў бяспечнага дарожнага руху.
22 лютага па ўсёй краіне пройдзе адзіны дзень бяспекі дарожнага руху пад дэвізам «Ад сумлення не схавацца». Работнікі аддзела ДАІ Бабруйскага РАУС у гэты дзень правядуць у працоўных калектывах размовы з работнікамі, нагадаюць, як правільна сябе паводзіць у выпадку, калі стаў віноўнікам ДТЗ, чаму нельга пакідаць месца здарэння, асабліва ў выпадках, калі не толькі пашкоджаны механічныя транспартныя сродкі, але і панеслі пакуты людзі.
