На мерапрыемстве было заслухана выкананне пратакольных даручэнняў папярэдняга пасяджэння, абмеркаваны актуальныя пытанні.
— Насцярожанасць па Афрыканскай чуме свіней у свеце застаецца, таму тэма прафілактыкі хваробы, якая прыносіць шкоду і эканамічную, і маральную, не губляе вастрыні. Мы ў раёне перыядычна праводзім штаб, удзел у якім прымаюць зацікаўленыя службы: ветэрынарная, праваахоўныя органы, таварыства паляўнічых і рыбаловаў, сельвыканкамы — усе, хто стасуецца з насельніцтвам і вядзе тлумачальную работу таксама і ў гэтым накірунку. Абмяркоўваем сітуацыю, меры прафілактыкі, яшчэ раз узгадняем дзеянні кожнай службы на выпадак заносу хваробы ці падазрэння на яе, — адзначыў Аляксей Жураўлёў.
Да таго ж, як ён заўважыў, з надыходам “чарнічнага” перыяду, які не за гарамі, актуальнасць тэмы значна ўзрастае: людзі будуць масава ісці ў лес, а значыць — павінны быць яшчэ раз папярэджаны і праінфармаваны, як сябе паводзіць, прыйшоўшы дадому, асабліва, калі ў гаспадарцы маюцца свінні. Насцярожанасць, як было адзначана, грамадзяне павінны праяўляць і падчас гібелі хатняй жывёлы (свіней). У такім выпадку важна не пакінуць факт без увагі — абавязкова звярнуцца ў сельвыканкам ці райветстанцыю для выяўлення прычыны. Сярод мер прафілактыкі, да якіх вяскоўцам рэкамендавана прыслухацца, таксама і набыццё выключна сертыфікаваных камбікармоў для свіней.